Compostaxe
A Concellería de Medio Ambiente do Concello de Redondela continúa desenvolvendo unha intensa campaña de sensibilización cidadá sobre a compostaxe, as súas vantaxes e a importancia de utilizar un sistema de tratamento dos residuos municipais sostible desde o punto de vista ambiental que, ademais, proporciona un fertilizante orgánico de alta calidade.
Por iso, prosegue coa campaña de fomento da compostaxe doméstica polos centros culturais das parroquias. A veciñanza recibiu unha pequena charla informativa sobre o seu uso de cara a acadar un mellor aproveitamento. Tamén poderá solicitar composteiros individuais todo aquel que os precise.
O ciclo da compostaxe
Que é?
Un proceso de transformación da materia orgánica (restos da colleita, excrementos de animais e residuos urbanos) para obter un fertilizante natural, é dicir, o compost.
Para que se usa?
Para mellorar a fertilidade da terra e como alimento para as plantas.
Que tipos existen?
-
Compost en compostador
-
Compost en montón
-
Vermicompost
-
Bokashi ou xaponés
O proceso da compostaxe
Esta transformación lévase a cabo en calquera casa mediante un composteiro, sen ningún tipo de mecanismo, motor ou gasto de mantemento. Vexamos o proceso:
-
Prepárase a base de materiais leñosos, materiais secos como pólas e follas.
-
Engádense os materiais húmidos, primeiro os restos de comida e enriba os de poda.
-
Opcionalmente, para acelerar o proceso, podemos botar esterco, terra da horta ou compost.
-
Para pór en marcha o composteiro, enchémolo polo menos ata a metade coa mestura de materiais secos e húmidos.
Vantaxes
Gran parte dos residuos que xeramos nas nosas casas son materia orgánica que se pode aproveitar, cun tratamento previo, como fertilizante orgánico en hortas e xardíns. A compostaxe doméstica ten moitos beneficios para todos:
-
Reduce a cantidade de materia orgánica que acaba nos vertedoiros.
-
Diminúe o uso de fertilizantes inorgánicos.
-
Aforra auga de rego debido á capacidade de retención da auga do compost.
-
Achega nutrientes necesarios para o desenvolvemento das plantas de forma natural.
-
Evita os malos cheiros e diminúe os riscos de contaminación.
-
Reduce os custos de transporte dos residuos, co conseguinte beneficio para a cidadanía.
